ಅಂಚಿನ ಜೀವನ

ಕತ್ತಲು ಬೆಳಕುಗಳ ನಡುವೆ ಜೀವನ
ದುಖಃ ಸುಖಗಳ ಸಮ್ಮಿಶ್ರಣ
ಸಾವು ಬದುಕುಗಳ ನಡುವಿನ ಪಯಣ
ಮಿಂಚಿ ಮರೆಯಾಗುವ ಯೌವನ
ಭೋಗ ಯೋಗಗಳ ಅಂಚಿನ ಸಮನ್ವಯ
ಪ್ರಕೃತಿಗೊಂದಿಹ ಮೈ ಮನ
ಎಚ್ಚರು ನಿದ್ರೆಗಳಲಿ ಹಂಚುತ ಪ್ರತಿದಿನ
ಸಾಗುತ ಬಹುದೂರದ ಪಯಣ

ನನ್ನವರೆನ್ನುವ ಬೆಚ್ಚನೆ ಭಾವನೆ
ತಿಳಿಯದೆ ನಿರ್ಮಿತ ಭಾಂದವ್ಯದ ಬೆಸುಗೆ
ಕತ್ತಲೆ ಅಂಚಿನ ಬೆಳಗಿನ ಕಿರುನಗೆ
ಬೆಳಕೊಳು ಹೊಕ್ಕಿಹ ನೆರಳುಗತ್ತಲೆ
ನಮ್ಮೊಳಗಿಹ ನಿಮ್ಮನು ಅರಿಯದೆ
ಕತ್ತಲು ಬೆಳಕೊಳು ನಡೆಸುತ ಜೀವನ
ದುಖಃ ಸುಖಗಳ ಸಮ್ಮಿಲನ

ಜಾಮಿತಿ ಬಲ್ಲವನೆ!

ಅಗಣಿತ ಲೋಕದ ಸೃಷ್ಠಿಯ ಒಡೆಯನು
ಸೂತ್ರಗಳಿಟ್ಟಿಹನೆ!
ಚಿತ್ರ ವಿಚಿತ್ರವ ರೂಪಿಸುವಾತನು
ಜಾಮಿತಿ ಬಲ್ಲವನೆ!
ವೃತ್ತ ತ್ರಿಭುಜಗಳ ಚಿತ್ತದಿ ಕಲ್ಪಿಸಿ
ಕಲೆಯನು ಕೆತ್ತಿಹನೆ!
ಸೂಕ್ಷ್ಮಾನಂತಗಳೊಳ ಹೊರ
ವಿಶ್ವದ ಕೆತ್ತನೆ ನಡೆಸಿಹನೆ!

ಶಿಲ್ಪಿಯು ತರ್ಕಕೆ ಸಿಗುವವನೆ!
ಸೃಷ್ಟಿಯ ಬುದ್ದಿಗೆ ನಿಲುಕುವನೆ!
ಸೃಷ್ಟಿಯ ಪ್ರಜ್ಞೆಯೆ ತಾನಾಗಿರುವನೆ!