ನಾನೊಂದು ಗೂಬೆ

ನನ್ನ ಹೆಸರು ಗೂಬೆ
ನನ್ನಿರುವು ಮರದ ಮೇಗೆ
ರಾತ್ರಿಯೆಲ್ಲ ದುಡಿದು ದಣಿವೆ
ಹಗಲು ಮಲಗಿ ಕಾಲ ಕಳೆವೆ
ಊರ ತುಂಬ ಜನ ಜಂಗುಳಿ
ಕಾಡಿನೊಳಗೆ ಬಿಸಿಲು ಗಾಳಿ
ಮಲಗಲೆಂತು ನಿದ್ದೆ ಬರಲು
ಅದಕೆ ಬರುವೆ ಹಾಳು ಮನೆಗೆ
ಊರ ಹೊರಗೆ ಮಸಣದೆಡೆಗೆ
ನಾನು ಒಂದು ಶಕುನವಂತೆ
ನನ್ನ ಹೆಸರು ಗುಮ್ಮವಂತೆ
ರಾತ್ರಿಹೊತ್ತು ತುತ್ತ ಕೊಡುತ
ಗುಮ್ಮ ಬಂತು ಎನುತ ತಾಯಿ
ಕೇಳಿ ಹೆದರಿ ಕಲ್ಲಹೊಡೆದು
ಮಲಗ ಬಿಡದ ಮಕ್ಕಳು
ಹಗಲು ಇರುಳು ನಿದ್ದೆಯಿಲ್ಲ
ಶಕುನ ನನ್ನ ಜೀವವು
ನಾನು ಒಂದು ಹಕ್ಕಿ
ಹಣಿವರೇಕೆ  ಇದ್ದರೂನು
ರೆಕ್ಕೆ ಪುಕ್ಕ ಎಲ್ಲರಂತೆ
ನಾನು ಒಂದು ಹಕ್ಕಿ

ಬೆತ್ತಲೆ ಜೀವ

ಬಿರು ಬಿಸಿಲಿಗೆ ಬಿಸಿ ಉಸಿರುತ
ಬೆತ್ತಲೆ ನಿಂತಿಹ ಬೆಟ್ಟ ಬಯಲು
ಬಾಯಾರಿದ ಕಾಡ ಮೃಗ ಪಕ್ಷಿ
ಕಾಡ ಕೂಗಿಗೆ ಓಗೊಟ್ಟು
ಸರಿದನು ರವಿ ಪಡುವಣದಡಿ

ಕವಿಯಲು ಕಾರ್ಮೋಡ ಖಗದಲಿ
ಕಪ್ಪಾಯ್ತು ಕಾನನ ಮಂಜ ಮುಸುಕಿನಲಿ
ನಡುಗಲು ಎದೆ ಸಿಡಿಲು ಗುಡುಗಿಗೆ
ಮನೆ ದೀಪ ಮಂಕಾಯ್ತು ತಣ್ಣನೆ ಗಾಳಿಗೆ
ಗಕ್ಕನೆ ಕಾಣುತ ಪಕ್ಕನೆ ಕಣ್ಮರೆ
ಮಿಂಚಿನ ಬೆಳಕಲಿ ಕಾನನ ಮುಸುಕಲಿ

ಸೆಟೆಯಿತು ದರಗೆಲೆ ತಟಪಟ ಸದ್ದಲಿ
ಚಟ ಪಟ ಛಾವಣಿ ಹನಿಯಲು ಮಳೆಹನಿ
ಮಿಂದಿತು ಮಳೆಯಲಿ ಬೆತ್ತಲೆ ಕಾನನ
ಮಿಂದವು ಖಗ ಮಿಗ ಕಾನನ ದಡಿಯಲಿ
ಮಿಂದವು ಮೃಗಗಳು ಚಟ ಪಟ ಹನಿಯಲಿ

ಮುನಿಸಲು ಮನ ಬೆಚ್ಚಗೆ ಮಲಗಲು
ಅಂಗಳಕಿಳಿಯುತ ಮಳೆಯಲಿ ನೆನೆಯುತ
ತುಂತುರು ತಾಕಲು ತಣಿಯಿತು ತನು ಮನ
ನೋಡಲು ಹಿಂಬದಿ ಜೋಡಿಯೆ ಬಂದಿದೆ
ತಾನೂ ನೆನೆಯುತ ಬಾಲವ ಕುಣಿಸುತ
ತನ್ನನೆ ನೋಡುತ ಸುತ್ತಲು ಓಡುತ
ಮರಿ ನಾಯಿ ಬೆತ್ತಲೆ ನಿಂತಿದೆ ಚಳಿಯಲಿ
ಮೈಯನು ಕೊಡವುತ ಬಾಲವ ಕುಣಿಸುತ.